Святителю Иоанну
Шанхайскому и Сан-Францисскому Чудотворцу
Совершается
в субботу ближайшую к 19-му июня по стар. стилю
Содержание: На
Великой вечерне. На
утрени. Канон.
Молитва.
Акафист.
На ГОСПОДИ, ВОЗЗВАХ стихиры
Святителю на 8, глас 6,
подобен: Все отложивше:
Воспоём святителя Христова Иоанна, Богом дарованнаго молитвенника нам, иже
молитве непрестанной прилежа, служением же Литургии и причащением святейших
Таин укрепляем, исходяше на делание свое бодренно, поспешая в домы страждущих и
в больничныя палаты к обреченным, сего ради освящен и милостив явися, исцелений
же и прозрения дара свыше сподоблен бысть, и ныне сый на небеси, со
дерзновением молится о спасении душ наших.
Воспоим святителя Христова Иоанна, отроком, отроковицам и младенцем любезна
целителя, возрастным советодавца мудра же и твердаго, матерем о чадах
известителя, крещаемым же и венчаемым благословения подателя, провождаемым в
жизнь вечную молитвенника вернейша, ревнителя лепоты и чина службы Божия,
пастыря же и архипастыря, предводяща овцы своя богоданныя, к нему же возопиим:
о блаженне чудотворче Иоанне, моли о нас, любовию чтущих тя.
Восток и запад, север и море ликуйте, память празднующе святителю чудотворца
небеса радуйтеся, ангела новаго приемлюще, молитвенника богодухновеннаго, и
пастыря безсеребренника, благодатнаго целебника, пророка и благовестника,
Иоанна милостивого нашего заступника.
Ины стихиры, глас 3:
Преподобием и правдою пожив на земли, и добре стадо Христово упас, ветхаго
человека совлекся еси, и прилоги вражия отразил еси, неусыпным бдением и
зельным пощением и молитвою пламенною ко Господу, юже и о нас ныне вознеси,
отче Иоанне.
Како не дивимся неусыпному трезвению твоему, и како не воспоим постническое
житие твое како не воспоим, посреде бо мира во зле лежащего подвизался еси,
пустынникам древним ревнуя, темже и любовь истинную ко Господу стяжал еси, еюже
покрый нас, чтущих память твою.
Добрый служителю Христова Евангелия, иже истиною Православия препоясався,
пращею словес твоих, волки тяжкия отгнал еси, не исповедающия Христа истинную
премудрость Божию, и иныя чуждыя премудрости ищущия, темже и нас умудри во
спасение, блаженне и богомудре Иоанне, чтущия светло всекрасную память твою.
Слава, самогласен, глас 6: Днесь собравшеся человека Божия,
архипастыря избраннейшего, светильника русскаго рассеяния, учителя языков
различных, странника в мире сем временнем, наследника премирнаго Царствия
Небеснаго, Иоанне, Святителя возлюбленного, и воззовем к нему: моли Господа присно
о спасении душ наших.
И рыне, Богородичен догматик 6-го гласа.
Вход, прокимен дня, и Чтения
3: Притчей, Притчей и Премудрости Соломони.
НА ЛИТИИ стихира храма и
стихиры Святителю, глас 6:
Отрок сый еще млад, умилился еси словесем Христовым, имиже воззва Господь
святыя апостолы первые, сице рек: По Мне грядита, Аз же сотворю вы ловца
человеком. Внимая же сим божественным глаголом, о смиренномудре Иоанне, ты
никакоже и не помыслил еси себе быти жребием подобна Божиим посланником
последним и насмертником. Сам Христос тя ведый, тя прослави. Буди же нам
увенчание твое к покаянию нелицемерному воззвание, во спасение душ наших.
Глас 1: Бесплотным силам, непрестанно Бога хвалящим, достойно поревновал еси
приснобденный Иоанне преподобне, любовью огненною твоею, сего ради тех
ликостоянием сопричтался еси.
Апостола благодатного времен безблагодатных, юродивым подражателя
премудрого, и постников великонравного единоревнителя, тя, отче Иоанне, велий
чудотворче, восхваляем.
Слава, глас 1: Дивному во святых Своих, Богу и Владыце, пение и
исповедание приносиши непрестанно, в Триех Лицех познаваемому, в существе же
Едином проповедаемому, храм Свой в души твоей воздвигшему, и светом Своим
присносущным осиявшему тя, тобою же и нас просвещающему.
И ныне: Радуйся, Пречистая Дево, радуйся Богоневесто, радуйся, верных
прибежище, радуйся святителей непрестанное пение, радуйся, храмы Твоя
воздвигнути даровавшая угоднику Твоему блаженному Иоанну, егоже молении
приемши, спаси благочестно поющия тя.
НА СТИХОВНЕ стихира глас 1,
подобен: Небесных чинов:
Бодрствуя и моляся во дни и в нощи, побеждал еси вся искушения вражия,
Иоанне святителю терпеливейший, от младенства служити правде Божией восхотевый,
к небесному же царствию всегда устремлен, сущих же зде на земли утешая и милуя.
Глас 6: стих: Во всю землю изыде вещание их и в концы вселенныя
глаголы их.
Наслаждение тленное всеконечно отринув, Господу твоему последовал еси, и
пастырский жезл, яко тяжкий крест восприим, овцы твоя управил еси, пред ними
ходя и глашая по имени, и мы глас твой добре ведуще, вслед тебе ходити тщимся,
ты же в радость Господа твоего ныне возшед, неотлучен от нас пребуди.
Стих: Небеса поведают славу Божию, творение же руку Его возвещает
твердь.
Наставник воистину всемирный, благочестия учителю и Духа Святаго сосуде
избранный показался еси, блаженне Иоанне, темже вси концы тя прославляют, от
восток солнца даже до запад, в храм твой притекающе к мощем твоим, исцеления и
помощь в скорбех приемлют, ты бо в радость Господа твоего возшед, неотлучно от
нас пребываеши.
Слава, глас 6: Образ воистину был еси верным, словом житием любовию,
духом верою и чистотою, темже во всю землю изыде вещание исправлений твоих, и
на небеси обрел еси мзду трудов твоих, но и земных не разлучился еси, яко
источник благодати приснотекущий, мощи твоя нам оставил еси, и ныне молишися во
еже добрый плод духовный принести нам, иже даров твоих насладившимся.
И ныне, Богородичен глас тойже:
Творец и избавитель мой, Пречистая, Христос Господь из Твоих ложесен прошед,
в мя оболкийся, первыя клятвы Адама свободи. Темже Ти, Всечестная, яко Божия
Матери же и Деве, воистинну вопием немолчно: радуйся ангельски, радуйся
Владычице, предстательство и покрове, и спасение душ наших.
Тропарь, глас 5:
Попечение твое о пастве в странствии ея,/ се прообраз и молитв твоих, за мир
весь присно возносимых:/ тако веруем, познав любовь твою, святителю и
чудотворче Иоанне!/ Весь от Бога освящен священнодействием пречистых Таин,/ ими
же сам присно укрепляем,/ поспешал еси ко страждущим, целителю отраднейший.//
Поспеши и ныне в помощь нам, всем сердцем чтущим тя.
(Дважды и Богодорице Дево: дважды)
Ин тропарь, глас 1-ы.
Святительства дар приумножил еси, слова проповеданием апостолом поревновав,
бдением же и постом и молитвою с преподобными вменился еси, клевету и поношения
с кротостию приемля. Сего ради Христос тя прослави чудесы, ихже обильно
изливаеши на всех с верою притекающих к тебе: и ныне спасай нас молитвами
твоими, Иоанне досточудне, святителю Христов.
Тропарь, глас 5-й: Попечение твое о пастве: дважды....
Радуйся, двере Господня непроходимая: радуйся стено и покрове притекающих к
тебе, радуйся, необуреваемое пристанище, и неискусобрачная, рождшая плотию
Творца Твоего и Бога: молящи не оскудевай о воспевающих и кланяющихся рождеству
Твоему.
По 1 стихословии: Седален, глас 6:
Божия слова служителю верный, и Духа Святаго сосуде избранный, тя на камени
заповедей Христовых дом души твоея утвердил еси, и воздвигшимся ветром
искушений, не падеся внутренняя храмина твоя, сего ради и власть тебе дадеся
чувственному вихрю и трусу запретити: но и нас огради ныне от волн моря
житейского, и в пристанище тихое управи.
Слава и ныне, глас тойже:
Изнемогает слово, еже пети, Владычице, величия Твоя и славити чудеса Твоя во
всяком роде и роде, темже краткими глаголы и многим упованием архангельски
вопием Ти: "Радуйся, Благодатная."
По 2 стихословии: Седален, глас 7:
Верою и любовию память твою, небесный человеке и ангеле земный, вси почитаем
днесь: в мире бо многомятежнем пустынник истинен был еси, и страсти вся
умертвив, на высоту духовную неудобозримую достигл еси, воистину чудо святейшее
во мраце века сего был еси: сего ради удивляемся велицей славе твоей яже на
небеси, и умиленно торжествуем прославление твое.
Слава и ныне, глас тойже: Отчая божественная Премудрость и Слово
прежде век сущее, божественныя славы неотлучное, от Тебе же, Богомати, нищету
нашу восприемлет и в рабий образ нетленне воображается, да к первей славе и
лучшему блаженству возведет древле падшия, темже Тя, Владычице, яко Тобою
избавленнии немолчно ублажаем.
Полиелей и Величание:
Величаем тя, святителю отче Иоанне, и чтим святую память твою; ты бо молиши
за нас Христа Бога нашего.
По полиелеи Седален святителю глас 4:
Славы древних святых преизрядный ревнителю, востоку неведомых и западом
небреженных, тех стопам последовал еси, и предстательством их покрываяся,
единовсельник тех по смерти явился еси, мы же к твоему заступлению прибегаем
ныне: не презри убогих, отче Иоанне, но в святое сие собрание введи нас, яко
единонадесятаго часа делателей, да взыдем на место последние, среди первородных
церкви торжествующе.
Слава и ныне, богородичен, глас тойже:
Сошедшеся днесь, совершаем торжество дивного святителя Иоанна, иже воздвиже
тебе храм, Владычице, яко всем скорбящим радость и немощным помощь и исцеление
ты еси, и к тебе припадаем, споручника сего имуще: помози нам в немощех
недугующим и грехи многими отягощенным, да твоими молитвами милость обрящем от
Сына Твоего и Бога нашего.
Степенна, антифон ... гласа
Прокимен, глас 4: Честна пред Господем смерть преподобных Его. Стих:
Что воздам Господеви о всех, яже воздаде ми;
ЕВАНГЕЛИЕ от Иоанна, зачало 35, от полу.
По 50 псалме СТИХИРА, глас 6:
Радуются днесь православных собори, и ликующе светло, величают светильника
нового, древним святителем равносиятельна, на конец веков возсиявшего миру и
земныя вся концы просветившаго, Иоана пречудного, преподобным спостника и
святителем собеседника, исповедникам равного крепостию и безмездным целителем
венец и украшение, прино моляшеся о душах наших.
Святителю глас 4:
Песнь 1.
Ирмос: Моря чермную пучину, невлажными
стопами, древний пешешествовав Израиль, крестообразныма Моисеовыми рукама,
Амаликову силу в пустыни победил есть.
Припев: Святителю отче Иоанне, моли Бога о
нас.
Благо есть воспевати угодники Божия, в их же лице нам радостне светит святый
Иоанн, утешая, врачуя его призывающия, научая нас образом многотрудного жития
своего ревновати о помощи сущим в бедах.
О желание сердца боголюбивого! Возжелал еси еще в возрасте детищном истины
быти поборник! Тако бо плениша тя повести о непощадивших жизни своя за правду
Божию множества дивных святых!
Привременно недоуменен был еси, еже каковый путь, воинский или гражданский
себе избрати. Но зреяше в душе твоей крепчайша мысль: всего себе предати на
служение святей церкви Христовой.
Богородичен: (Величит душа Твоя, Владычице,
Господа нашего и радуется дух Твой о Бозе Спасе и Сыне Своем! И како смели бы
мы воспевати песнь Твою, аще не благоволила бы Сама пророчески рещи, яко
ублажат Тя вси роди.)
Мы о Тебе хвалимся, Богородице, и к Богу тя имамы непостыдное
предстательство, простри руку Твою необратимую и сокруши враги наша, ниспосли
Твоим рабом помощь от святаго.
Песнь 3.
Ирмос: Веселится о Тебе Церковь Твоя Христе,
зовущи: Ты моя крепость, Господи, и прибежище, и утверждение.
С веселием совершаем память твою, архипастырю наш и наставниче, поклоняемся
честным и нетленным мощем твоим, просяше молитв твоих.
Восприял еси образ ангельский, и оболкся еси во вся оружия Божия, ополчився
еси противу духов злобы поднебесных и побеждая их.
Не давал еси сна довольна очесем твоим, не возлегл еси на одр во еже почити.
Уподобился еси отцем древлим, о подвижниче!
Богородичен: (Богоизбранная Отроковице,
приведенная во храм Господень, воспитавшаяся во храме во Святая Святых, истинно
вышши еси всех, Дево чистая.)
Рай жизни сущи, Богородице, смерти греховныя и страстей многообразных избави
мя вскоре.
Седален, глас 4:
Молитва твоя, отче Иоанне, аки столп огненный до небес досягаяй явися,
путеводящ Израиля новаго в житейстем странствии, сего ради чтущим тя терпение
даруй и благодарение Господу в сердцах насади, да не якоже ропотницы оныя,
египетских мяс рачителие осудимся, но да уподобимся земли Обетованныя нетленных
благ насладитися.
Слава и ныне, глас тойже:
Утверждение нам еси, Богомати, и священное прибежище влающимся прилоги
вражиими, Тобою же покрываеми, прощение грехов и дерзновение ко Господу
обретаем.
Песнь 4.
Ирмос: Вознесена Тя видевши Церковь на
Кресте, солнце праведное, ста в чине своем, достойно взывающи: "Слава силе
Твоей Господи."
Множества российских архипастырей наставник, зарубежныя же Церкве
начинатель, сам сый ревнитель монашеского жития, тя, святе Иоанне, чудом наших
дней именова и в подвизех крепкостоятельна.
Аще хощете, людие, святаго жива видети, во град Битоль поспешайте, людие,
зрите тамо отца Иоанна! Тако сербский именитый архипастырь изрече, нравом же и
делы Иоанновыми восхищенный.
Юношы карпаторусстии, сербкой богословии питомцы, о тебе с великим умилением
повествоваху, о твоем к себе непощадении и к ним любве, еже како осенял еси их
крестным знамением ты, ходя между спящими, покой их соблюдая.
Богородичен: Пречистая Мати Господа нашего и
Дево, милующая и грешнейших рабов Своих, яко милосердия сокровищница
пребогатая, обнови нас, безмерно обнищавших, всех скорбящих Заступнице и
Радосте!
Песнь 5.
Ирмос: Ты, Господи, мой, свет в мир пришел
еси, Свет Святый, обращаяй из мрачна неведения, верою воспевающыя Тя.
Подражатель истинный Христов был еси, святителю, душу полагаяй за паству
свою, и предстал еси пастыреначальнику непостыдно.
Исцелений дар дадеся ти еще в пресвитерстве, приумножил еси его во дни
святительства и усовершаеши в ином и вечном житии.
Преподобному Науму был еси содейственник во исцелениях, со иконою его святою
посещая домы человеков страждущих.
Богородичен: Богородице Дево, вселенной
благая Помощнице, Целительнице душ и телес наших, услыши нас и в день сей
молящихся Тебе.
Песнь 6.
Ирмос: Возопи прообразуя погребение
тридневное пророк Иона, в ките моляся: От тли избави мя, Иисусе, Царю сил.
Приидите, восхвалим Богородице храм воздвигшаго, самого же всем скорбящим
радость и храм Духа Святаго бывшаго.
(Яви тя, Святителю чудне, Владыка Христос Церкве Своея Святыя строителя и
учителя, даром утешений же и исцелений облагодатствованна.)
Поспешал еси и в домы страждущих и в палаты больничныя к недугующим, о нихже
сказа ти Господь, яко Пречистых Таин его преподатель.
Ты болящим младенцем явился еси здравия ходатай, святый Иоанне, скорбь
родительских душ пременяя на радость, и всем возрастом ты показался еси
вожделенный помощник.
Богородичен: (О Тебе, Богородице Дево,
святии всю радостне празднуют, и на Тя уповаем раби Твои мы, многогрешнии,
веселися и радуйся, Мати Христа Вседержителя.
Отечества православного лишихомся, Владычице, внегда волны гнева Господня
над ним проидоша, зане хранителие суетных и ложных содеяхомся, внегда же
скончаватися душам нашим, Господа помянухом, да приидет к нему Тобою наша
молитва и пение.
Кондак, глас 4:
Христу пастыреначальнику последовав, во святителех изряднейший явился еси,
спасл бо еси овцы своя от губительства безбожных, пристанище мирное тем
учредив, и попечение непрестанное о пастве имея, врачевал еси их недуги
душевныя же и телесныя, и ныне о нас к твоим честным мощем припадющих, моли
Христа Бога, отче Иоанне, в мире спастися душам нашим.
Икос: Небеса ныне с нами радуются и лицы
святых приемлют новое и преславное украшение: апостолы проповедника всемiрнаго
целуют, мученицы древнии восхваляют дивно прославльшаго память их, святители
собеседуют равному в словеси и премудрости, бденному же подвижнику преподобнии
дивятся, царие святии дивнаго молитвенника за восстановление царства
православнаго почитают, безсребренники с целителем безмездным мзду нетленную и
неделимую разделяют, елико всеславно бысть служение твое, отче Иоанне, тако и
венцев тебе исплетеся множество, но молися купно с лики святых ко Христу Богу
от нас, к честным мощем твоим припадающих, в мире спастися душам нашим.
Песнь 7.
Ирмос: В пещи Авраамстии отроцы персидстей,
любовию благочестия паче, нежели пламенем опаляеми взываху: "Благословен
еси в храме славы Твоея, Господи."
Сына света и дне благодать воистину тя содела: на всяк день бо святыми
Тайнами укрепляем и обожаем утвердил еси в Господе сердце твое.
(Поспешая ко страждущим, присно душу твою за овцы твоя полагал еси, темже и
чудотворений дар тебе дадеся, молитвами бо твоими немощствующии препоясашася
силою, и нищии в добродетели от гноища страстей воздвигошася.
Зарею пресветлою людем паствы твоея просиял еси, отче Иоанне, внегда
смутитися душам их в годину Божия гнева, но помянул есть Господь и милость Свою
и смиренныя тобою утеши.)
Милостивым предстательством твоим верныя и неверныя спасахуся и дары
благодатныя приимаху, ты же, даруя независтно исцеления, во тьме прелести не
оставляеши пребывати заблуждшия, но единого Царя славы учиши православно
воспевати во вся веки.
Помощь и утешение изгнанным людем своим дивно сотвори Господь, даровав нам
тя заступника, святителю Иоанне, но и ныне покрый нас от враг наших невидимых и
из руки всех, ненавидящих нас.
Богородичен: Отцы наши согрешиша и предани
быша в руки врагов беззаконных и лукавнейших паче всея земли, что убо сотворим,
Владычице, согрешения родительская непрестанно умножающе, и како козней лютых
избегнем, аще не ты заступиши кающияся и спасения требующия.
Песнь 8.
Ирмос: Руце распростер Даниил, львов зияния
в рове затче: огненную же силу угасиша, добродетелию препоясавшеся, благочестия
рачители отроцы взывающе: "Благословите вся дела Господня Господа."
Сердце твое распространися ко всем, любовию молящимся, Иоанне святителю,
поминающим подвиг всего многотрудного жития твоего, безболезненное же и легкое
преставление твое, Одигитрии Пречистые верный служителю.
Ничтоже возможе препати ти, посещающу в больнице чад твоих, пастырю добрый,
ни дождь, ни буря, ни тьма нощная, иногда никомуже зувущу, духом предвидя нужды
их, Господу поспешствующу и указующу, да вси прославят Бога Отец наших.
Егда царства православная на земли падоша и забвению предана быша, не
престал еси победы просити царем благоверным в древних песнех неизменно, яко
тех держава точию благословенна есть от Бога отец наших.
Богородичен: Величит душа моя, Владычице,
Господа нашего и радуется дух Твой о Бозе Спасе и Сыне Твоем. И како смели
быхом мы воспевати песнь Твою, аще не бы благоволила сама пророчески рещи, яко
ублажат мя вси роди.
Песнь 9.
Ирмос: Камень нерукосечный от несекомыя
горы, Тебе Дево, краеугольный отсечеся, Христос совокупивый разстоящаяся
естества, тем веселящеся, тя, Богородице, величаем.
Поспешая ко страждущим, присно душу твою за овцы твоея полагал еси, темже и
чудотворений дар тебе дадеся, молитвами бо твоими немощствующии препоясашася
силою, и нищии добродетелию от гноища страстей воздвигошася.
Зарею светлою людем паствы твоея просиял еси, отче Иоанне, внегда смутитися
душам их в годину Божия гнева, но помянул есть Господь милость свою и смиренныя
утеши тобою.
К царству Божию пути наша направи, послуживый ему преподобием и правдою вся
дни живота твоего, настави разум людей твоих ко спасению и просвети во тьме и
сени смертней седящия, отче блаженне Иоанне, да радостно поюще совершаем память
твою.
Богородичен: Настави ноги наша на путь
мирен, Всечистая Владычице, мир истинный к человекам приведшая, Сына Твоего
Крестом вражду упразднившаго и древняго супостата победно низложившаго.
Светилен:
Аще и умрох плотию, но жив есмь, не скорбите, людие, сице по преставлении
твоем возвестил еси, светом таинственным просвещая тя поющия, отче Иоанне,
Святителю предивный.
Слава и ныне: О Тебе, Богородице Дево,
святии вси празднующи радуются, и на Тя уповаем мы раби Твои многогрешнии,
зовуще: веселися и радуйся, Мати Христа Вседержителя.
На Хвалитех стихиры Святителю
4, глас 4:
Благодарно воспоим, вернии, Господеви Богу нашему, и восхвалим Его по
множеству величествия Его, даровавшаго нам заступника изряднаго, на земли
чудотворившаго, и с небесе на убогия призирающаго, емуже ныне приносим пение и
к мощем его припадаем со страхом, избавления прегрешений просяще и душам нашим
спасения.
Доброго пастыря и детопиталеля восхвалим, сей бо тщание о пастве имея,
наипаче о детях сиротах имеяше попечение и обитель им сотвори, святителя Тихона
в помощь призвав, и не остави их в беде, сущей брани от безбожных, но дажде до
края вселенныя в тихое пристанище пресели, егоже молитвами и нам, Спасе,
сотвори милость.
Бденное пение совершающе, вернии, восхвалим Господа Бога нашего и Его
доброго служителя, егоже избра, яко не от мира бысть: сей бо образ показа нам
терпения и молитвы непрестанныя, бодростию препобеждая телесе немощь, Божию же
мудростию просвещен, правые веры ревнитель бысть, верныя всяко наставляя, темже
молитвами его Христе Боже наш, подаждь нам в правой вере и благочестии пребыти.
Дивнаго Бога во святых Своих, всякое дыхание псаломски да восхвалит, на
конец веков низпославшаго нам чудное утешение, Иоанна святителя всемiрнаго,
истины поборника крепкого, посреде соблазнов и лжи недвижно пребывающаго, и от
мрачныя прелести вся воздвизающаго, и ко спасению нас приводящего.
Слава , глас тойже: Исповедуем дивное заступление твое, не таим еже
на нас бывших чудес твоих, ходатаю наш ко Господу святителю Иоанне, имиже
упованию православному обучаеши нас, маловерных и унывающих и ропотливых, да твоими
молитвами помощь Божию имамы, еюже спасаемся от рода сего развращеннаго, чтущия
достойно память твою.
И ныне, Богородичен, глас тойже: Богородице, всех Царице,
православных похвало, еретичествующих шатания разори, и лица их посрами, не
кланяющихся, ниже чтущих, Пречистая, честный Твой образ.
Славословие великое, Тропарь, и отпуст.
.
иже во
святых отцу нашему Иоанну,
чудотворцу
Шанхайскому и Сан-Францисскому
О святителю чудне Иоанне,
толико распространил еси сердце свое, яко нетесно вмещается в нем множество
почитающих тя человеков от различных племен и народов.
Призри на убожество словес наших, обаче от любве к тебе приносимое и помози
нам, угодниче Божий, поне отныне очищати себе от всякия скверны плоти и духа,
работая Господу со страхом и радуяся Ему с трепетом.
И что воздамы тебе за радость оную, юже ощутихом, зря в храме святем мощи
твоя святыя и прославляюще память твою.
Воистину, не имамы чим воздати, точию: аще начнем себе исправляти, бывая
новыми вместо ветхих.
Сея благодати обновления буди нам ходатай, о святе Иоанне, преставленный от
сего временного во иное житие вечное, в неже настави тя Пречистая Владычица,
Одигитрия зарубежия и рассеяния русского, чудотворною Своею иконою Коренно-
Курскою, Ея же спутник ты явился еси в день преставления своего, о Ней же
радуешися ныне в лице святых, славящих единаго в Троице славимаго Бога, Отца и
Сына, и Святаго Духа ныне и присно и во веки веков. Аминь.
Кондак 1
Избранный чудотворче и изрядный угодниче Христов, всему миру источаяй
обильныя струи духовнаго наставления и дивных чудес множество, восхваляем тя с
любовию и зовем ти: Радуйся, святителю отче Иоанне, в бедах скорый помощниче.
Икос 1
Ангела образом яви тебе в последняя времена всея твари Создатель, да с
Материю Божиею печешеся о людех земных. Взирающе же на добродетели твоя,
преблаженне Иоанне, вопием ти сице: Радуйся, с ранняго детства благочестием
украшенный. Радуйся, иже со страхом и трепетом волю Божию исполнивый. Радуйся,
иже явивый благодать Божию в тайных благодеяниих. Радуйся, быстрое далече сущих
страждущих услышание. Радуйся, любвеобильное поспешение ближним своим во
спасение. Радуйся, радование всем с верою к тебе припадающим. Радуйся,
святителю отче Иоанне, в бедах скорый помощниче.
Кондак 2
Видяще обильное добродетелей твоих излияние, святителю славный Иоанне,
просвещаемся духом, яко живоносный источник чудес Божиих напаяеши нас, верно
вопиющих к Богу: Аллилуиа.
Икос 2
Разум имеяй преисполненный любве, купно и богословия, богомудре Иоанне, и
богопознанием умудренный, и к страждующим людем любовию украшенный, познавати
истиннаго Бога нас научи, да и мы во умилении вопием ти: Радуйся, непоколебимая
твердыне истины православия. Радуйся, драгоценный сосуде Духа Святаго. Радуйся
честный обличителю неверия и лжеучения. Радуйся, ревностный исполнителю
заповедей Божиих. Радуйся, подвижниче не даяй на ложе себе отдохновения.
Радуйся, возлюбленный пастырю стада Христова. Радуйся, святителю отче Иоанне, в
бедах скорый помощниче.
Кондак 3
Силою благодати Божия благий сиропитатель и наставник юношам явился еси,
воспитуя в страсе Божием и приуготовляя их к служению Богови. Сего ради чада
твоя взирают на тя и благодаряще вопиют Богу: Аллилуиа.
Икос 3
Имеяше воистинну, отче Иоанне, с небесе тебе песни воспеваемей быти, а не от
земли: како бо кто от человек возмогл бы твоих дел величие проповедати; мы же,
приносяще Богу, яже имамы, вопием ти сице: Радуйся, непрестанною молитвою
покрываяй чада твоя. Радуйся, охранителю стада твоего крестным знамением.
Радуйся, любве великия вместилище, не взираяй на языков различия. Радуйся,
святильниче всесветлый и вселюбимый. Радуйся, образе молитвы непрестанныя и
милосердия. Радуйся, утешений духовных подателю требующим. Радуйся, святителю
отче Иоанне, в бедах скорый помощниче.
Кондак 4
Бурею напастей одолеваеми: како достойно возможем восхвалити чудеса твоя,
блаженне Иоанне; яко прошел еси до конец вселенныя, спасения ради паствы твоея
и благовествования Евангелия сущим во тьме. Благодаряще же Бога за апостольския
труды твоя, воспеваем Ему: Аллилуиа.
Икос 4
Слышаша ближнии и дальнии величие чудес твоих, Божиею Материю даже до нашего
времене являемых, темже в тебе Богу прославляющемуся дивящесе, в страсе
вопияху: Радуйся, просветителю сущих во тьме неверия. Радуйся, приведый людей
твоих с востока дальняго до запада. Радуйся, источниче чудес изливаемых Богом.
Радуйся, в любовию вразумляяй заблуждающих. Радуйся, скорый утешителю кающихся
о гресех своих. Радуйся, потевождю грядущих путем правым. Радуйся, святителю
отче Иоанне, в бедах скорый помощниче.
Кондак 5
Богодарованный свет явился еси, бури всех лютых разгоняяй, сущих на острове
от вихрей смертоносных молитвами твоими охраняяй, святителю Иоанне, и крестным
знамением ограждаяй. Научи и нас, призывающих тя в помощь, чудотворче святый, к
Богу со дерзновением взывати: Аллилуиа.
Икос 5
Видим многую помощь твою в напастех и обстояниих, преблаженне отче Иоанне,
дерзновенный бо ходатай пред престолом Божиим и скорый в бедах помощник еси.
Того ради и мы на твое предстательство пред Богом уповаем и вопием ти: Радуйся,
стихий опасных прогонителю. Радуйся, молитвою твоею от нужд избавляяй. Радуйся,
алчущим хлеба присный подателю. Радуйся, приуготовляяй просящим изобилие.
Радуйся, утешителю в скорбех сущих. Радуйся, многих падших от погибели
исхитивый. Радуйся, святителю отче Иоанне, в бедах скорый помощниче.
Кондак 6
Проповедуя спасение, яко новый Моисей гугнивый явился еси, изводя люди твоя
из плена безбожных, преблаженне Иоанне. Избави и нас от работы греховныя и
врагов невидимых, да радуюшеся вопием к Богу: Аллилуиа.
Икос 6
Возсияв праведностью твоею, совершил еси неисполнимое, о добрый пастырю:
преклонил бо еси власти мирския сострадати о людех твоих. Того ради с ними
купно и мы благодарственно вопием ти: Радуйся, пастырю добрый, пастве твоей,
пресельником, тихое пристанище уготовавый. Радуйся о детех и болящих наипаче
попечение имевый. Радуйся, усердно тя призывающим верно помогаяй. Радуйся, яко
в немощнем телеси твоем сила Божия независтно совершашеся. Радуйся, отразителю
нападения нечестивых. Радуйся, помрачителю лжи и проявителю истины. Радуйся,
святителю отче Иоанне, в бедах скорый помощниче.
Кондак 7
Хотя достойно прославити древних святых Запада, отпадшаго от истины, восстановил
еси почитание их в Церкви Православной, о любителю святых Востока и Запада.
Днесь с ними на небеси моли о нас, поющих на земли: Аллилуиа.
Икос 7
Новаго видим тя избранника Божия, иже вкупе со святители древния Галлии
явился еси в последняя времена яко един от сих, вдохновляя паству твою
соблюдати православную веру, якоже же сии на Западе исповедаху. Сохрани и нас в
вере сей пребывати, вопиющих ти: Радуйся, новый Мартине в воздержании, подвизех
и чудесех твоих. Радуйся, новый Германе во исповедании твоем православныя веры.
Радуйся, новый Иларие в божественном богословии. Радуйся, новый Григорие в
почитании и прославлении угодников Божиих. Радуйся, новый Фаусте иноческим
усердием. Радуйся, новый Кесарие в твердой любве ко правилом церкве Божии.
Радуйся, святителю отче Иоанне, в бедах скорый помощниче.
Кондак 8
Странное видение предста ти: в земли новей встретил еси паству твою бывшую,
смущаему скорбями многими, но яко дивный пастырь наставил еси ю поучением,
терпением и праведностию твоею, и церковь Божия Матере, яже всех скорбящих
Радость есть, воздвигл еси: мы же удивляющеся терпению и смирению твоему,
благодарно вопием к Богу: Аллилуиа.
Икос 8
Всего себе предав Христу, был еси делатель винограда Его, богоносне отче, не
ведал бо еси покоя до конца многострадальнаго живота твоего. Помози и нам
недостойным в деланиих наших и в нашем прилежании в верности Христу, да
славяще, вопием ти: Радуйся, претерпевый до конца и достигший спасения.
Радуйся, пред иконою Богоматери умрети сподобивыйся. Радуйся, посреде гонения
неправедного мужественный правды хранителю. Радуйся, совершивый служение свое
до конца и кончину приемый седя, яко иерарх. Радуйся, по смерти утешивый паству
чудесным своим возвращением. Радуйся, многих чудес подателю к раце твоей с
верою и любовию притекающим. Радуйся, святителю отче Иоанне, в бедах скорый
помощниче.
Кондак 9
Все естество ангельское восхождением твоея души в небесныя обители
возрадовашася, мы же удивляющеся твоим чудесем на земли, действом Святаго Духа
являемым, воспеваем Богу: Аллилуиа.
Икос 9
Ветии многовещаннии не возмогут изобразити по достоянию строгости жития
твоего, о праведне отче Иоанне, понеже дом благодати неизреченнаго Бога был
еси, мы же не можем умолчати, чудеси явлену нашему маловерному веку дивящеся, и
прославляем тя сице: Радуйся, божественных наставлений палато. Радуйся, яко
смиренным деланием ангелы сослужители себе сотворивый. Радуйся, обретый вечное
и нерукотворное жилище на небесех. Радуйся, врачебнице, в нейже всяк недуг от
Бога врачуется. Радуйся, молитвеннаго подвига хранилище. Радуйся, освященный
храме Духа Святаго. Радуйся, святителю отче Иоанне, в бедах скорый помощниче.
Кондак 10
Спасти хотя мир, иже всех Спаситель, новаго святаго посла нам, и чрез него
из темных глубин греховных воззва ны. Слышаше же его нас призывающа, мы
недостойнии взываем к Богу: Аллилуиа.
Икос 10
Стена еси всем прибегающим к твоему небесному заступлению, отче Иоанне,
темже и нас от демонских нападений ограждай, в бедах и нуждах, стужающих нам на
земли помогай, да с верою тебе взываем: Радуйся, ослепших прозрение. Радуйся,
силою молитвы жизнь на смертном одре сущим подаваяй. Радуйся, богооткровенное
вразумление в смятении и сомнениях сущим. Радуйся, спасительная благо,
орошающая в знойной печали погибающих. Радуйся, сирым и оставленным отеческое
заступление. Радуйся, святый учителю ищущих истины. Радуйся, святителю отче
Иоанне, в бедах скорый помощниче.
Кондак 11
Пение непрестанное ко Пресвятей Троице, преблаженне отче Иоанне, мыслию,
словом и доброделанием принесл еси: многим разумением истинныя веры Божия
повеления уяснил еси верою, надеждою и любовию наставляя нас в Троице Единому
Богу воспевати: Аллилуиа.
Икос 11
Светодательна светильника православия сущим во мраце неведения зрим тя,
стада Христова добрый пастырю. Тако и по успении твоем являеши истину неведущим
ея, просвещая души верный, вопиющих ти таковая: Радуйся, просвещение мудростию
Божиею сущих в неверии. Радуйся, радуго тихия радости кротких. Радуйся, громе,
устрашаяй во гресе упорствующих. Радуйся, молние, ереси пожигающая. Радуйся,
одождение догматов православия. Радуйся, орошение богомыслия. Радуйся,
святителю отче Иоанне, в бедах скорый помощниче.
Кондак 12
Благодать, данную ти от Бога ведающе, сию с благоговением и благодарностью
приемлем, к заступлению твоему чудному притекающе, о всехвальне отче Иоанне,
твоя же чудеса прославляюще, взываем е тебе: Аллилуиа.
Икос 12
Поюще хвалу Богу, небесный сонм святых радуется, яко не остави Господь
падший и безверный мир, но явил есть всемогущую силу свою на тебе, кротком и
смиренном служителе, о блаженне Иоанне, и мы со всеми святыми радующеся, чтим
тя сице: Радуйся, новая звездо праведности, на небе возсиявшая. Радуйся, новый
пророче, посланный пред конечным воцарением зла. Радуйся, якоже Иона о
возмездие за грехи предрекий. Радуйся, якоже Креститель всех к молитве и
покаянию призывавый. Радуйся, якоже Павел много терпевый ради Евангелия и
проповедания веры. Радуйся Апостоле новый, своими чудесы вселяяй в нас
благоговейный трепет и веру. Радуйся, святителю отче Иоанне, во бедах скорый помощниче.
Кондак 13
О пресветлый и предивный угодниче Божий, святителю отче Иоанне, утешение
всем в скорбех сущим, нынешнее наше молитвенное приими приношение, да молитвами
твоими от геены огненныя избавимся и богоприятным твоим ходатайством сподобимся
во веки воспевати Богу: Аллилуиа.
(кондак сей глаголи трижды таже икос 1-й и
кондак 1-й).
Икос 1
Ангела образом яви тебе в последнее времена всея твари Создатель, да с
Материю Божиею печешеся о людех земных. Взирающе же на добродетели твоя, преблаженне
Иоанне, вопием ти сице: Радуйся, с ранняго детства благочестием украшенный.
Радуйся, иже со страхом и трепетом волю Божию исполнивый. Радуйся, иже явивый
благодать Божию в тайных благодеяниях. Радуйся, быстрое далече сущих страждущих
услышание. Радуйся, любвеобильное поспешение ближним своим во спасение.
Радуйся, радование всем с верою к тебе припадающим. Радуйся, святителю отче
Иоанне, в бедах скорый помощниче.
Кондак 1
Избранный чудотворче и изрядный угодниче Христов, всему миру источаяй
обильныя струи доховнаго наставления и дивных чудес множество, восхваляем тя с
любовию и зовет ти: Радуйся, святителю отче наш Иоанне, последних времен
чудотворче.
Молитва
О святителю отче Иоанне,
пастырю добрый и тайновидче душ человеческих! Ныне у престола Божия за нас
молишися, якоже и сам посмертне изрекл еси: аще и умрох, но жив есмь. Умоли
Всещедраго Бога прощение нам во гресех даровати, да бодренно воспрянем, и Богу
возопием о даровании нам духа смирения, страха Божия и благочестия во всяческих
путех жизни нашея, яко милостивый сиропитатель и искусный наставник на земли
быв, ныне буди нам путеводитель и в смутах церковных Христово вразумление.
Услыши стенание смятенных юношей нашего лихолетия, обуреваемых беснованием
вселукавым, и призри на уныние изнемогающих пастырей от утеснения тлетворнаго
духа мира сего и томящихся в нерадении праздном, и ускори на молитву, слезно
вопием ти, о теплый молитвиниче: посети нас сирых, по всему лицу вселенныя
резсеянных и во отечествии сущих, но слабою любовию ко свету Христову
влекущихся и ждущих твоего отеческаго наставления, да благочестию навыкнем и
неследницы царствия небеснаго явимся, идеже ты пребываеши со всеми святыми,
славяще Господа нашего Иисуса Христа, емуже честь и держава ныне и присно и во
веки веков. Аминь.